VÉMONOS Á VOLTA DAS VACACIÓNS

 Lembrade que o luns 17 temos a nosa vindeira xuntanza.

Que teñades unhas boas vacacións e felices lecturas!

QUINTA XUNTANZA

 

A novela que nos reúne hoxe, O home que matou a Antía Morgade, é o último libro que conforma a triloxía negra de Arantza Portables.

En xeral, concluímos que foi o que menos nos gustou dos tres porque, aínda que é bastante adictivo, é pouco sorprendente e vai perdendo forza.

A novela é autoconclusiva e pode lerse dexeito independente, pero opinamos que é mellor seguir unha orde para entender mellor os sucesos e coñecer máis en profundidade aos personaxes. Por iso aconsellamos ler primeiro Beleza Vermella, logo A vida secreta de Úrsula Bás e, para rematar, este.

O estilo característico de Arantza Portables é evidente nesta novela, pero quedamos coa Portables máis intimista. Ela mesma dixo nunha entrevista: “teño que volver escribir como o fixen en Deixe a súa mensaxe despois do sinal”.

 

A seguinte lectura será Las gratitudes, da francesa Delphine de Vigan. Falaremos dela o 17 de abril.

VÉMONOS O LUNS

 Lembrade que o próximo luns temos a xuntanza do noso club.

Non faltedes!

CUARTA XUNTANZA

 

Deixe a súa mensaxe despois do sinal é unha novela que moitos coñeciamos, pero que non todos leramos. Por iso decidimos que fose a nosa terceira proposta.

Nesta novela atopamos capítulos que van ir intercalando a vida de catro mulleres: Marina, Carmela, Sara e Viviana, para tecer a súa historia. Aparentemente non se coñecen de nada, pero acaban compartindo moito máis do que podemos imaxinar e invítannos a reflexionar arredor de que dor pode ser peor á vez que se van entretecendo fíos que dan paso a un porvir de esperanza.

É unha obra que aborda moi diferentes temáticas, e iso deu lugar a un debate sobre as tecnoloxías e novas formas de comunicarse, a saúde mental ou sobre a trata de mulleres.

Relacionado con isto, propuxemos e comentamos outras obras como A dúbida (M. Reimondez).

Quedamos con ganas de ler máis de Arantza Portables, por iso para a próxima xuntanza imos ler o último libro desta autora: O home que matou a Antía Morgade.

LEMBRA QUE NOS REUNIMOS O 13 DE FEBREIRO

 Lembra que acordamos non celebrar a xuntanza correspondente ao mes de xaneiro para non interferir con probas de recuperación e outras actividades programadas no centro. Así que xa sabes, ata dentro dun mes temos tempo para ler.

Pero non te despistes, que o tempo logo pasa!

NON FALTES!

TERCEIRA XUNTANZA

 

A novela que comentamos nesta xuntanza é Del color de la leche, que nos permitiu coñecer outra forma pouco habitual de narrar que, ao principio, pode dificultar entrar na historia, pero que moi pronto captamos a mensaxe e nos deixamos atrapar pola mesma.

Con ela emocionámonos, enfadámonos, rimos… un libro dos que gustan, deses que terminas e queres que todo o mundo o lea.

Na mesma liña, a autora escribiu La escuela de canto, da que tamén falamos porque varios dos integrantes do club se animaron a lela.

Para o próximo mes leremos Deixe a súa mensaxe despois do sinal, de Arantza Portables. Autora que xa coñecemos porque o alumnado de cuarto da ESO leu Beleza Vermella, que tamén leron varios membros do club de lectura, xunto con A vida secreta de Úrsula Bas, e en xuño do curso pasado fíxonos unha visita ao centro.

 

Anímate e ven o 13 de febrero!

E ata entón... BO NADAL!

LEMBRADE QUE A VINDEIRA SEMANA TEMOS UNHA CITA!

 Como van esas lecturas?

Non esquezades que nos vemos o próximo luns!