10ª reunión do club (4 de xuño de 2018)

 E chegamos ao final do camiño...

A última reunión do Club por este curso celebrouse, como xa vén sendo o habitual nos últimos anos, cun xantar compartido na Biblioteca, acompañado das sobremesas que trouxeron os membros. Vaia magdalenas as de Nerea e María!

Nesta última reunión houbo tempo para facer a valoración final das lecturas do 2º cuadrimestre que nos quedaban pendentes, 'Izan o da saca' e 'Inés y la alegría'. Ambas foran escollidas principalmente polos membros do profesorado do Club, que resaltaron a intriga desenvolvida en 'Izan...' e a sorpresa que implicou para moitos ao descubrir o intensa que fora a presenza nazi en Galicia. Tamén se apuntou o feito de que fose un tema que comeza a aparecer na narrativa galega dos últimos anos. Así apuntáronse títulos como 'De cabalos e lobos' (2015) de Fran P. Lorenzo.

De 'Inés y la alegría' resaltouse a ambición narrativa de Almudena Grandes no seu intento de dar voz aos personaxes anónimos da posguerra española, ás persoas comúns que non saen nos libros de Historia pero que si contribúen a facela.

Neste sentido, os membros do Club manifestaron a intención de continuar o vindeiro curso co 2º volume desta serie de "Episodios de una guerra interminable", 'El lector de Julio Verne' (2012).

Xa nas sobremesas, houbo tempo para facer valoración de como se desenvolveu este curso o Club de lectura. Pedimos sobre todo a opinión dos membros, profesores e alumnos, que se incorporaran por 1ª vez. Para María e Nerea (2º ESO), o mellor son as comidas cos compañeiros, ese tempo compartido fóra da rutina habitual das clases e tamén a posibilidade de ler outras cousas que non son as obrigatorias e compartilas a outro nivel. Para as profesoras Rosa e Isabel (novas este curso) era a 1ª vez na súa vida que estaban nun Club de lectura, malia ser as dúas grandes lectoras, e destacaban o gran ambiente que se creaba nas reunións, a posibilidade de interactuar cos alumnos a outro nivel fóra das aulas e a gran cantidade de libros lida por suxestión doutros membros do Club. Para o resto dos membros do Club, xa máis veteráns, o mellor deste curso foron as lecturas escollidas e tamén o encontro con Iglesias Turnes na anterior reunión.
Houbo momentos tamén para as despedidas xa que hai unha alumna (Gala Cernadas), que remata os seus estudos de 2º de Bach e que foi membro do Club durante toda a súa etapa académica, e para lembrar a antigos membros do Club como Eva Olveira ou a profesora Isabel Regueiro a quen botamos de menos este curso. Aquí están as dúas na comida do ano pasado:

Xa para finalizar a reunión tamén houbo tempo, como non!, para as recomendacións lectoras e para anticipar outra das propostas de lectura para o curso que vén. A profesora Chus Barbeira -coordinadora tamén do Club de lectura de 1º da ESO recomendounos a última novela de John Boyne, El niño en la cima de la montaña (2016)

e desvelounos que a lectura de 'Costa do Solpor. O regreso á Illa do Tesouro' (2017) de Xosé Mª Lema irá acompañada o curso que vén dun roteiro co propio autor para os membros do Club de Lectura, polo que nos animou a iniciar canto antes a lectura.

A Coordinadora do Club recomendounos 2 libros, non de narrativa!: o ensaio de Manuel Rivas Contra todo isto (2018) e o poemario de Antía Otero O cuarto das abellas (2017).

A profesora Marina recomendounos unha tradución ao galego, a novela O hibisco púrpura (2017), da escritora nixeriana Chimamanda Ngozi Adichie.

A profesora Rosa recomendounos a novela gráfica Estamos todas bien (2017) de Ana Penyas.

Natalia recomendounos La canción de Shao Li (2009), de Marisol Ortiz de Zárate.

Foi unha gran reunión que nos anima a continuar co Club o curso que vén. E xa levamos 6!!

9ª reunión do curso (14 de maio de 2018)

Na Semana das Letras Galegas, a nosa sesión do Club de Lectura tivo como eixo central a visita do escritor Manuel Iglesias Turnes, con quen dialogamos a propósito das súas novelas 'As rapazas de Xan' e 'Que non te aten'.

Foi unha sesión intensa na nosa propia Biblioteca onde Manuel Iglesias compartiu connosco as súas inquedanzas máis humanas e persoais sobre o proceso que o levou á escritura. Quedounos moi claro que a súa narrativa bebe da súa propia experiencia vital e profesional  que con ela busca reivindicar a Galicia do rural, do pasado e do presente.

Houbo tempo tamén para as nosas preguntas e para compartir co autor un fenómeno moi curioso que deriva da lectura dos seus libros: para moitos de nós e, tamén, para moitos membros das nosas familias (nais de profesores e alumnos e tamén avoas), os libros de Iglesias Turnes son, en palabras da nai de Jose (profesor de matemáticas), "de verdade"; ata o punto de que Jose lle explicou a Iglesias Turnes que a súa nai, que non le habitualmente e menos libros en galego, devorou este libro e agora non fai máis que esixirlle ao seu fillo que lle traia máis libros coma eses, que conten "cousas reais". Trátase de algo habitual entre os seus lectores que se recoñecen a eles mesmos ou recoñecen as súas propias lembranzas familiares nos libros do autor. Para Iglesias Turnes este é un efecto co que el nunca chegou a contar e que o sorprende en todos os encontros que ten con lectores.

Houbo tamén momentos moi distendidos, nos que compartimos risas, e no que lle entregamos ao ator o noso agasallo: unha libreta e unha pluma, para que continúe a escribir e unha Mª Victoria Moreno, feita pola nosa compañeiras Nieves, para que nos lembre con cariño.

Todo un agasallo o que el nos fixo a nós coa súa presenza!

8ª reunión do curso (7 de maio de 2018)

A unha semana da visita de Manuel Iglesias Turnes, reunímonos co obxectivo de preparar este encontro co escritor.

Preparamos cuestións para lle preguntar, ideas que compartir con el respecta da lectura e tamén anécdotas persoais a respecto do curioso impacto que os seus libros están a ter entre persoas do nosos ámbito familiar e que queremos compartir con el.

7ª reunión do curso (23 de abril de 2018)

Nesta Semana do Libro tivemos reunión do club para facer valoración das lecturas que estamos a realizar, especialmente dos libros de Manuel Iglesias Turnes, que nos visitará  o 14 de maio.

O alumnado decántase por destacar a vindicación da vida no rural que se realiza en 'Que non te aten' posto que o habitual para eles non é ler libros de literatura galega actual con esta ambientacións, senón ambientados nas cidades ou memos fóra de Galicia. O profesorado do grupo sinala que 'As rapazas de Xan' está a resultar unha lectura que os conecta con experiencias e lembranzas familiares, con historias evocadas nas reunións de familia, ademais de compartir as opinións do alumnado.

Polo que respecta a 'Izan o da saca', de momento só varias profesoras do grupo se decantaron por esta lectura ao priorizar os libros de Iglesias Turnes pola visita do escritor, polo que esperaremos ás vindeiras reunións para a súa valoración. O mesmo ocorre coa proposta en castelán 'Inés y la alegría' de Almudena Grandes.

A reunión rematou coa presentación dun agasallo especial que a profesora Ana Penedo (veterana membro do Club e coordinadora TIC do centro) nos tiña preparado para o Día do Libro: modelados 3D feitos a partir de obxectos reais, os nosos libros do Club!

Estes son os libros do 1º cuadrimestre:

Estes son os do 2º cuadrimestre:

Foi un agasallo moi especial que valoramos todos con entusiasmo

Acordamos volver reunirnos o día 7 de maio para organizar o encontro con Iglesias Turnes (preguntas, rolda de intervencións, etc.).

6ª reunión do curso (19 de marzo de 2018)

Tal e como acordamos ao inicio de curso, a reunión previa ás vacacións de Semana Santa estivo dedicada á presentación por parte de cada un dos membros do Club das nosas recomendacións lectoras. Así, tanto alumnado como profesorado falamos daqueles textos literarios que cremos de interese para os nosos compañeiros, tanto sexan de actualidade como clásicos. Foi unha reunión estupenda en canto á variedade é á calidade das propostas ofertadas; hai para escoller...

A profesora Rosa Quinteiro falounos de 2 títulos en banda deseñada: o primeiro titúlase 'Papel estrujado' de Nadar (pseudónimo de Pep Domingo). Editado en 2013, está protagonizado por un conflitivo adolescente de 16 anos e un home de mediana idade desencantado da vida.

A segunda proposta titúlase 'Valerosas: mujeres que solo hacen lo que ellas quieren' de Penélope Bagieu. Trátase de 2 volumes aparecidos en castelán en 2017 que suman 30 retratos de mulleres que reinventaron os seus destinos.

A profesora Isabel Rodríguez traía unha triple proposta lectora: 'Relatos de un náufrago' de Gabriel García Márquez, 'Erros e Tánatos' de Gonzalo Navaza e 'Anxos en tempos de chuvia' de Miguel Vázquez Freire.

Para a nosa compañeira, podemos escoller entre a intensa brevidade da historia do náufrago, a alta calidade dos relatos de Gonzalo Navaza e ou a triste historia da adolescente Anxos. Textos breves, pero de calidade, para gozar estas vacacións.

O profesor José Manuel Pérez tamén traía unha triple presentación: en 1º lugar,  quixo presentarnos a obra do escritor francés Emmanuel Carrêre a través de dúas das súas obras: 'El adversario' e 'El reino'. Jose destaca deste escritor a profundidade na creación dos personaxes, moitas veces tomados da realidade, a súa capacidade para ofrecernos unha visión máis profunda e ás veces desacougante dos mesmos.

A 3ª proposta de Jose Manuel era o clásico norteamericano 'A estrada' de Cormac McCarthy, así como a súa versión cinematográfica, protagonizada por Viggo Mortensen. Trátase dunha historia postapocalíptica na que un pai e o seu fillo recorren unha Norteamérica devastada por un acontecemento nuclear.

A profesora Rocío Romero, pola súa banda, compartiu connosco a súa valoración de 'Patria' de Fernando Aramburu, unha novela xa compartida por outros membros do Club como Diego Vázquez.

A profesora Marina Rial falounos de 'El niño con el pijama de rayas' de John Boyne, que tamén conta cunha versión cinematográfica.

.

E para rematar coa quenda do profesorado, a coordinadora do Club falounos de 2 novidades literarias: a reedición de 'Diario da luz e da sombra' (2004), de María Victoria Moreno, co gallo do Día das Letras 2018, e a última entrega de Fernando Aramburu, 'Autorretrato sin mi' (2018).

Para a coordinadora trátase de 2 lecturas que descobren a interioridade dos seus autores e ofrecen páxinas de verdadeira beleza sobre o sentido da vida e do paso do tempo.

As recomendacións do noso alumnado do Club de lectura comezaron con Alberto Miranda, quen se decantou por 'A praia dos afogados' de Domingo Villar. Para Alberto é unha novela que te engancha desde o primeiro momento e moi adecuada para estes días festivos. Tamén se pode completar, como en recomendacións anteriores coa versión cinematográfica.

Pola súa banda, Diego Vázquez falounos de 'Fariña' de Nacho Carretero, un libro de enorme repercusión mediática neste momento pola sentenza xudicial que pesa sobre el. Diego falounos do libro (posúe un exemplar!) e de como o enganchou a historia que alí se conta. Os outros membros do Club, moitos dos cales está a ver a serie de TV baseada no libro, preguntáronlle pola relación entre o libro e a serie.

Balbina Rodríguez tamén trouxo 2 propostas á reunión: 'Recordarán tu nombre' de Lorenzo Silva e 'Justicia ¿Hacemos lo que debemos?' de Michael J. Sandel. A 1ª proposta é unha novela que recrea a postura dun militar leal á República no Golpe de estado de 1936. A 2ª é un ensaio sobre o papel da sociedade nu cumprimento da xustiza, se é algo individual ou se cedemos esa responsabilidade ao Estado.

A alumna Nerea Rojo falounos de 'Rebelde' de Manuel L. Alonso, unha novela que amosa a amizade e os conflitos dos adolescentes.

Pechou a quenda do alumnado Natalia Lema cunha dupla recomendación procedente da literatura hispanoamericana: 'Un viejo que leía novelas de amor' do escritor chileno Luis Sepúlveda e 'Las batallas en el desierto' do escritor mexicano José Emilio Pacheco. Para Natalia, a 1ª proposta é unha novela que encarna a vellez, o amor, a soidade e a idiosincrasia dun pobo; a 2ª é unha novela de desesperación, de amor entre idades diferentes, de vidas que parecen truncadas polo destino e as decisión que nos obrigan a tomar..

Non houbo tempo para máis... Varios membros do Club quedaron se poder intervir e quedounos tamén pendente a valoración das propostas de lectura que temos entre mans. Así, fixouse a vindeira reunión para a volta das vacacións, o luns 16 de abril.