NA REUNIÓN DE ONTE FALAMOS DE...

 ...Un pouco de todo, como case sempre.

Despois de lamentar e desculpar a ausencia das persoas que non puideron asistir, empezamos comentando os libros que cada un leu ou está a ler.

Neste capítulo hai de todo, como case sempre tamén, e como ten que ser:

Hai persoas que seguiron as suxestións do noso itinerario lector -grandes viaxes-, entre as cales están 

    Marina, con Os nenos da varíola (María Solar)

    Ana, con El médico, que non estaba proposto no tríptico (non cabe todo) pero efectivamente nesta novela nárrase un gran periplo atravesando Europa e parte de Asia e, como gran novela que é, sempre merece unha relectura.

    Paula e Daniel, con Se o vello Simbad volvese ás illas (Cunqueiro)

        

Hai tamén quen preferiu outras temáticas, ou ben por ter lido xa os títulos propostos inicialmente no itinerario lector, por propostas xurdidas na reunión anterior, ou simplemente polas súas propias prefefencias e gustos. Isto apórtanos un plus de variedade á hora de comentar e suxerir lecturas máis diversas. Entre estas lectoras e lectores temos:

Antón con Izan o da saca (Xavier Quiroga)

Sergio con Desayuno con partículas (Sonia Fernández Vidal)

Soraya, con Golpes de luz (Ledicia Costas)

Chus, con Los vercejos (Fernando Aramburu)

            

Despois dos correspondentes comentarios, pasamos ao capítulo de propostas/propósitos de lectura para  as próximas semanas. 

Aquí xurdiron varias que iremos atendendo pouco a pouco, e que cada un/unha de nós iremos seleccionando e lendo ao noso ritmo.

Por exemplo:

Antón recomenda No me tapes el sol. Cómo ser un cínico de los buenos, de Eduardo Infante. Aproveita tamén para recomendarnos un programa de radio (RNE), Sapiens, aínda que lle vemos un pequeno inconveniente: que se emite ás 5 da mañá. Pero terémolo en conta para as noites de insomnio.

Sergio recomenda La puerta de los tres cerrojos, tamén de Fernández-Vidal

Paula propón El hogar de Miss Peregrine para niños peculiares, de Ramson Rigss, no que se basea a famosa película, e unha novela xuvenil: Al final mueren los dos/No final morren os dois, de Adam Silveira.

A proposta de Soraya é Cuaderno de urgencias, de Teresa Constenla.

E a de Chus, un libro de divulgación científica disfrazada de narrativa: a última publicación de Juan José Millas e Juan Luis Arsuaga: La vida contada por un sapiens a un neandertal. 

        

        

Cada un e cada unha de nós irá escollendo a súa lectura, e xa iremos falando e opinando sobre elas, ou ben aquí nos comentarios deste blog, ou na próxima reunión que será en xaneiro.

SEGUNDA REUNIÓN DO CLUB DE LECTURA

 Lembrade que mañá luns temos a reunión do noso Club, coma sempre na Biblioteca, ás 15:30.

Tal como acordaramos, esta vez xuntamos a reunión de novembro e a de decembro nunha soa, pois co adianto das avaliacións coincidía o último luns de novembro coa semana de exames, decidimos facer unha única sesión agora antes do Nadal.

Nesta reunión comentaremos os libros lidos neste trimestre, e faremos propostas de lectura para o Nadal e tamén para o mes seguinte.

Vémonos mañá!

TRISTE NOVA

Almudena Grandes, unha autora moi querida e moi lida neste club en cursos anteriores, finou onte.

Este club está de loito por unha gran narradora e unha gran loitadora por preservar a memoria histórica.

  

  

Que a terra che sexa leve, Almudena.

ROTEIRO LITERARIO CON XABIER QUIROGA

 O pasado sábado, varias persoas membros e ex-membros deste claustro participamos dun agradable encontro cun dos autores máis lidos no noso club: Xabier Quiroga, que nos acompañou polos espazos da súa última novela, O baile dos estorniños.

Falando desta actividade, do autor e da súa obra, xurdiu a oportunidade de facer un novo percorrido polas novelas de Quiroga ambientadas nesa Ribeira Sacra que el coñece tan ben, e nese tempo da guerra e a posguerra sobre o que tanto e tan ben ten escrito.

Por iso algún dos novos membros deste club se decidiron a emprender ou retomar a lectura de dúas das súas obras anteriores: O cabo do mundo e Izan o da saca, que, xunto con esta última publicación, forman a que se vén chamando "triloxía da Ribeira Sacra" ou, o que é o mesmo, a serie de misterios e crimes ocultos e finalmente descubertos grazas ás investigacións do gran Reina

        

ITINERARIO LECTOR: GRANDES VIAXES

 Na nosa primeira xuntanza faremos, entre outras cousas, a presentación do itinerario lector que suxerimos para este curso, arredor do tema das grandes viaxes, expedicións ou aventuras, unhas históricas e outras ficticias... ou ambas mesturadas, que tamén as hai.

Imprimimos algún tríptico, pero moi pouquiños para evitar o gasto excesivo de papel e tinta.

Por iso nos pareceu boa idea reproducir aquí o seu contido, así sempre o teredes á man se o queredes consultar.

Esta é a cara exterior:

E esta, a interior:

 ESPERAMOS QUE VOS GUSTE E QUE LEADES MOITO!

PRIMEIRA REUNIÓN DO CLUB DE LECTURA

 LEMBRADE!

O próximo luns, día 25, celebraremos a primeira xuntanza do noso clube

Como sempre, na Biblioteca ás 15:30 (antes das clases da tarde)

Que non vos esqueza!!!

CLUB DE MANGA E CÓMIC

 LE CON AKIRA!

Lembra que te podes apuntar ao club Akira, onde podes compartir as túas lecturas preferidas de cómic europeo, americano e xaponés (manga)

Na biblioteca atoparás unhas fichas que deberás cubrir e entregar para inscribirte. 

Se queres visitar o blog deste club, sigue esta ligazón

BENVID@S AO CLUB!

 COMEZAMOS!

Dámosvos a benvida de novo ao noso Club de Lectura.

Xa sabedes que temos un Club, que chamamos Letraferit Soneira, onde podemos participar alumnado, profesorado e persoal non docente. Reunirémonos unha vez ao mes para propoñer lecturas e comentalas, e tamén podemos comunicarnos de xeito virtual a través deste blog.

Ademais funcionarán tamén outros clubs máis específicos, como os de cómic e manga que coñecedes tamén dos cursos anteriores.

E... algunha sorpresa que xa vos iremos contando.

Toda a información que precisedes podedes pedila aos membros do equipo de Biblioteca, e tamén a eles lles podedes dicir se vos animades a participar nalgún dos grupos de lectura que se van ir formando.

Esperamos contar convosco para compartir as nosas lecturas preferidas.

Da posguerra e do wolfram: Febre, de Héctor Carré

 Ao fío da última proposta de lectura complementaria vén estoutra de Héctor Carré:

Febre (2011) é unha historia ambientada entre 1942 e 1944 en Noia, onde bole un intenso comercio legal e ilegal arredor da mina de wolfram de San Fins (Lousame). A historia está protagonizada por Carmucha, unha rapaza de 17 anos que decide enfrontarse á súa maneira coa situación represiva da posguerra.

Aínda que o nazismo en Galicia non é o eixo central desta novela, si que está moi presente a recreación do papel que xogou Galicia como subministradora de wolfram para os dous bandos en conflito durante a Segunda Guerra Mundial.

A novela obtivo o Premio Xerais de Literaturatura xuvenil do 2011.

Neste enlace ao blog do autor podedes atopar as súas valoracións sobre a obra.

Nestoutro enlace tedes un artigo moi interesante sobre a historia da mina de San Fins.

Lectura e cinema

 Continuando co tema proposto, os nazis en Galicia na primeira metade do século XX, gustaríame engadir outra proposta de lectura e tamén unha película.

O libro é «O volframio en Varilongo», Santa Comba de Xallas (1941-1963), de Carmen Blanco Ramos. Nesta ligazón atoparedes unha completa reseña do libro. E se queredes profundizar un pouco máis, aquí podedes ler tamén unha ampla reportaxe sobre o tema dos nazis, a industria da guerra e o wolframio nesa época.

E para acompañar a lectura, unha película coa mesma temática e ambientada tamén por aquí cerquiña, que podedes ver se premedes no seguinte enlace: Lobos sucios 

Lobos sucios é un filme español de drama e suspense, dirixido en 2015 por Simón Casal e protagonizado por Marian Álvarez e Manuela Vellés.

Aquí vos deixo unha páxina dos premios Goya 2017 (foi proposta, aínda que finalmente non obtivo o premio) onde podedes ver un resumo do argumento e o tráiler da película.