Reunión do 1 de decembro

Na pasada reunión do Club fixemos a 1ª valoración das lecturas deste trimestre: os 9 lectores do proxecto 'Odio el rosa' (Historia de Dani / Historia de Sara) valoran moi positivamente as lecturas, en especial, todo o apoio audiovisual que ten este proxecto (as cartas do xogo, o blog, etc.); o mesmo ocorre cos 3 lectores da 2ª proposta 'Las ventajas de ser un marginado', considerada unha proposta moi intelixente e actual. De feito, como idea deste grupo de lectores, dedicaremos as vindeiras reunións do Club (luns 12 e luns 19 de xaneiro) a realizar un visionado da adaptación cinematográfica e un coloquio sobre a mesma, de tal maneira que nos quede o Nadal para que máis membros do Club poidan ter o libro lido antes de ver a película.

Polo que respecta ás lecturas "para adultos", os 4 novos membros do Club leron xa as dúas primeiras partes da triloxía de Batzán de Dolores Redondo, polo que á volta do Nadal propoñeremos como lectura o 3º volumen, Ofrenda á tormenta', de recente aparición.

Polo que respecta aos 7 lectores de 'Os fillos do mar', estes valórana moi positivamente, destacando a magnífica ambientación do relato e o xogo cos distintos momentos históricos da mesma; polo que acordamos poñernos en contacto coa editorial para conseguir una visita do escritor ao noso Club. Neste sentido tamén, valoramos a lectura da segundo novela deste autor, A Memoria da choiva, para a volta do Nadal.

En último lugar, demos a benvida a un novo membro ao Club de Lectura: Killian Canosa Regodesebes (3º da ESO).

Próxima reunión do Club de Lectura o 1 de decembro

O vindeiro luns 1 de decembro reunirémonos na biblioteca no horario habitual (3.30 a 4.30) para facer a primeira posta en común das lecturas escollidas para este trimestre.

1º reunión do curso 2014-2015

Na tarde do luns 22 de outubro reunímonos na Biblioteca do IES Terra de Soneira coa intención de comezar oficialmente as actividades do noso Club de Lectura. Empezamos coa presentación de 3 propostas de lectura feitas por outros tantos membros do Club: Eva Olveira presentounos "Las ventajas de ser un marginado", una novela epistolar norteamericana da autoría de Stephen Chbosky  e que conta cunha versión cinematográfica do mesmo título estrenada no ano 2012.

A segunda proposta de lectura foi feita por Alexandre Pazos, quen nos presentou  un proxecto narrativo transmedia da editorial Oxford "Odio el rosa". Trátase dunha saga de literatura xuvenil da autoría de Ana Alonso e Javier Pelegrín que combina a lectura en formato tradicional coa lectura a través de medios dixitais na páxina web www.odioelrosa.com. Ata o momento o proxecto conta con 2 títulos: "Historia de Sara" e "Historia de Dani".

A terceira proposta de lectura veu da man de Gala Cernadas: "Just listen", de Sarah Dessen é una novela xuvenil protagonizada por Annabel Green, a rapaza que o ten todo... aparentemente.

Pola súa banda, a coordinadora do Club presentou dúas propostas de lectura, unha para as novas incorporacións ao Club deste curso e outra para os membros máis veteranos: a primeira proposta de lectura sería a triloxía de Batzan de Dolores Redondo (composta por "O gardián invisible" e "Legado nos ósos"), xa lida por nós o curso pasado, posto que está prevista a saída do 3º libro "Ofrenda á tormenta" para finais de novembro de 2014 e sería a nosa lectura para o 2º trimestre.

A segunda proposta sería "Os fillos do mar" (2012), de Pedro Feijoo. Esta exitosa novela obtivo o Premio Literario ''Arcebispo Juan de San Clemente'' 2013 e o Premio Literario Frei Martín Sarmiento 2014 e ten consolidado ao seu autor como unha das promesas da narrativa galega contemporánea.

Despois das presentacións, os membros do alumnado escolleron maioritariamente o proxecto "Odio el rosa" (9), seguido de "Las ventajas de ser un marginado" (2 alumnas e 1 profesora). En canto ao profesorado, a novela de Pedro Feijoo vai ser lida por 5 profesoras e 2 alumnas e o resto do profesorado lerá as novelas de Dolores Redondo.

A nosa vindeira reunión será a última semana de novembro ou a primeira de decembro.

 

Presentación do curso 2014-2015

Comezamos novo curso académico e con el as actividades do noso Club de Lectura. Este ano seguimos as mesmas persoas do curso pasado e temos novas incorporacións. Entre o alumnado, temos 13 membros: Eva Olveira e Nerea Rial (2º da ESO); Nuria Agra, Gala Cernadas, Marina García e Cristian Trillo (3º da ESO); Alberto Angües, Salomé González, Natalia Lema e Laura Roget (4º da ESO); Hellen Cristina e Alba Méndez (2º de Bach) e Alexandre Pazos (1º CSAF). Entre o profesorado, temos 10 membros: Anxo Brea e Mª Jesús Barbeira (dpto. Lingua Galega), Ana Penedo (Tecnoloxía), Carmen Rama (Latín), Ana Ramos (Administración), Isabel Regueiro (Física), Marina Rial (Orientación), Rocío Romero (Francés), Carmen Sanjurjo (Lingua castelá) e a coordinadora (Teresa Araújo).

Comezaremos as nosas actividades o luns 22 de outubro no horario habitual (3.30 a 4.30) coas presentacións das lecturas para o 1º trimestre deste curso e a escolla por parte dos membros do Club.

Coa visita de Xosé Mª Lema rematan as actividades do Club por este ano

O pasado luns 16 de xuño visitounos Xosé Mª Lema, autor de Costa do Solpor, a nosa lectura do 3º trimestre. No noso encontro houbo tempo para coñecer os antecedentes da obra e o seu proceso de elaboración e tamén para dar
as nosas opinións sobre os personaxes e a trama da obra.
O autor tivo, ademais, a amabilidade de incluír no seu blog (costadosolpor.blogspot.com.es) as opinións dadas por algún dos membros do noso Club. Deixamos aquí fotos desta estupenda reunión coa que rematamos as actividades por este curso.

Nova reunión do Club de Lectura o 5 de maio

Xa en pleno 3º trimestre do curso, reunímos para valorar as lecturas feitas nos últimos meses polos membros do Club: os 2 libros de Fernando Cimadevila e de Dolores Redondo e todos os membros do Club subscribimos o mesmo: ¡queremos as terceiras partes xa! No caso dos títulos de Fernando Cimadevila, a maioría valorou moito na continuación que se nos achegasen novos datos da vida e da personalidade dos personaxes principais e, no caso dos libros de Dolores Redondo, valorouse especialmente a profundización no drama familiar da inspectora protagonista. Para rematar a actividade do Club por este curso, decidímonos pola lectura da novela do noso veciño de Vimianzo Xosé Mª Lema: Costa do solpor, novela finalista dos Premios Xerais 2011. Este autor, ademais, reunirase co Club o vindeiro 16 de xuño para falarmos da súa obra e finalizar con este encontro a actividade do Club por este curso.

Imaxe da presentación de
Costa do solpor en Vimianzo, coa presenza do Alcalde.

Nova reunión do Club de Lectura o 10 de marzo

Nesta nova reunión valoramos as nosas lecturas deste trimestre.

Polo que respecta ao libro de Dolores Redondo, O gardián invisible, todos os que o lemos encontrámolo extraordinario e decidimos seguir co 2º volume da triloxía, Legado nos ósos.

  Polo que respecta ao libro de Fernando Cimadevila, O mundo secreto de Basilus Hofman: O ladrón de soños, tamén foi valorado como unha achega orixinalísima a literatura fantástica en galego. Continuaremos tamén co 2º volume, Un faro na escuridade.






Deixamos aquí algunhas fotos da reunión dese día no que tamén valoramos algunhas das propostas individuais de lectura feitas polos mebros do noso Club: Eva Olveira falounos da triloxía de Los juegos del hambre de Suzanne Collins.

Alba Méndez presentounos outra triloxía, esta de Kerstin Gier: Rubí, Zafiro e Esmeralda.

E Alberto Angües recomendounos un libro: Cielo rojo, de David Lozano Garbala .

Novo ano e novas lecturas para o Club Letraferit

O 27 de xaneiro reunímonos de novo na Biblioteca coa intención de dar por finalizada a nosa lectura do 1º trimestre e decidir cal/es habían ser as lecturas para o 2º trimestre. Os membros do Club valoraron moi positivamente a lectura do 1º trimestre, aínda considerando moitos deles que había unha certa desigualdade entre os tres volumes da triloxía (máis fantasía nos dous últimos, excesivo xa o terceiro...).
Para o 2º trimestre, a coordinadora do Club presentou unha serie de propostas de lectura, tanto en galego como en castelán, para sometelos á valoración dos seus membros, explicándolles brevemente de que ía cada proposta. Os membros do Club optaron por seguir dúas vías de lectura, aproveitando que o 2º trimestre é o máis longo deste curso:  os membros máis novos do Club (alumnado da ESO) optou pola lectura de "O mundo secreto de Basilius Hoffman. I. O ladrón de soños", de Fernando Cimadevila.

Os membros máis "vellos" do Club (alumnado de postobrigatoria e profesorado) optaron por comezar coa "Triloxía do val de Baztán" de Dolores Redondo, comezando por "O gardian invisible".

 

A próxima reunión do Club para facer a 1ª valoración destas lecturas será o luns 10 de marzo.

Primeira reunión de valoración de Memorias de Idhun

O 25 de novembro tivemos a 1ª reunión oficial do Club para valorar a nosa 1ª lectura do curso, Memorias de Idhún, de Laura Gallego. A maioría dos membros lera só o 1º volume da triloxía e valorábao moi positivamente, outros xa leran tamén o 2º e gustáralles máis có primeiro. Acordamos naquela reunión ler a triloxía completa e volvemos reunir en xaneiro para a valoración final e para acordar as novas propostas de lectura. Tamén aproveitamos para visionar a páxina web da autora e comprobar a existencia de versión en cómic dos dous primeiros volumes e que decidimos mercar.