2ª e 3ª reunión do club de lectura

 O luns 21 de decembro e o luns 8 de febreiro, ás 3.30 da tarde, tiveron lugar na Biblioteca do IES a 2ª e 3ª reunión do Club nas que falamos do que estamos a ler...

Curso 2020-21: A lectura no club Letraferit en tempos de pandemia

Para este curso tan peculiar que temos por diante propoñémonos un Itinerario lector a través de unha das temáticas de máis exíto da literatura galega deste segunda década do século XXI: a presenza dos nazis en Galicia. Esta temática, moi relacionada coa memoria histórica dos tempos da Guerra Civil e a posguerra, permítenos afondar nun dos episodios máis descoñecidos da nosa historia recente: a posición estratéxica de Galicia durante a Segunda Guerra Mundial, tanto para os alidos como para os nazis, e a presenza destes últimos no noso territorio despois da contenda buscando refuxio e como lugar de paso cara América.

Para afondar nesta temática podemos escoller entre os seguintes títulos:

A cova das vacas mortas, Jaureguízar, Xerais, col. Fóra de xogo. 2006.

 Podemos considerala un claro precedente (publicouse en 2006, obtendo o Premio Fundación Caixa Galicia de Literatura Xuvenil) desta temática. Na novela o protagonista (Xoel) é neto dun antigo nazi vinculado a Leni Riefenstalh e descobre que moi preto del (Negueira de Muñiz) viven agochados antigos xerarcas nazis.

Podemos consultar desde aquí a Ficha de lectura desta obra, así como unha axeitada recensión da mesma.

Máis recentes e tamén encadrables dentro da chamada "literatura xuvenil" temos outras dúas propostas:

Memoria do silencio, Eva Mejuto, Xerais, col. Fóra de Xogo, 2019

Nesta novela (finalista do Premio Jules Verne e Lista de Honra 2019 da OEPLI) ambientada na Ribadavia de 1943 un espía nazi intenta destapar unha trama internacional que axuda os xudeus a chegar a Portugal e abandonar Europa. Cómpre destacar que as irmás Touza da novela existiron en realidade e tiveron un papel moi destacado nesa trama internacional destimada a salvar seres humanos da barbarie nazi.

Podemos consultar desde aquí a Ficha de lectura desta obra, así como una recensión da mesma.

Wolfram. Espías, nazis e maquis, Alberto Varela Ferreiro, Xerais, 2020

Nesta estupenda novela gráfica, un espía inglés co nome de W. C. Morgan chega á Galicia de 1939 para investigar ata que punto chega a presenza nazi no noso territorio.

Podemos consultar aquí unha recensión da mesma. 

Para este itinerario temos 4 títulos aparecidos en colección para adultos. Trátase de:

Cabalos e lobos, Anxo P. Lorenzo, Xerais, 2015.

Esta novela, que obtivo o Premio Blanco Amor no 2014, está ambientada en Vigo en 1972 e nela a protagonista, descendente de alemáns, debe enfrontarse aos vencellos da súa familia e da cidade na que vive co nazismo.

Podemos consultar aquí unha excelente recensión da obra.

Por que as sombras non teñen ollos, Luís García-Mañá, Xerais, 2015.

Esta novela está ambientada en 1944 na fronteira entre Galicia e Portugal onde espías nazis e aliados intentan atopar a documentación que se transportaba nun avión inglés que se estrelou na Serra da Pena, á altura do marco nº 125 da fronteira entre Galiza e Portugal, entre o concello de Calvos de Randín e a vila portuguesa de Montealegre. 

Podemos consultar aquí unha excelente recensión da obra.

Izan o da saca, Xabier Quiroga, Xerais, 2015. XXII Premio Literario San Clemente, 2016.

 Nesta novela un investigador acepta o delicado encargo dun coñecido político e empresario galego de desentrañar un suposto pasado nazi co que os seus inimigos poden relacionalo. Con este encargo, realizarase unha perigosa pescuda sobre un dos feitos históricos máis intrigantes da posguerra: a misteriosa «Ruta das ratas» ao seu paso polo noroeste da península Ibérica e cara ao refuxio nazi en América do Sur.

Pódese consultar aquí unha estupenda recensión da novela.

O exército do fume, Manuel Gago, Xerais, 2018.

A novela está situada en 1942 cando Galicia vive dúas guerras ocultas ao tempo: na costa, nazis e aliados combaten no mar e nos portos polo dominio do Atlántico; no interior, a resistencia enfróntase teimuda ao poder de Franco, ata que todo se cruza cando unha mestra recibe o seu primeiro destino nunha distante aldea da Costa da Morte.

Pódense consultar aquí a presentación da novela que o autor realiza no seu blog persoal e unha entrevista co mesmo sobre a obra.

Para todos aqueles que queirades "aprofundar" nesta temática, podedes consultar estes artigos de prensa:

-          https://www.farodevigo.es/galicia/2009/07/28/huella-nazi-galicia-17915001.html

-          https://www.elconfidencial.com/espana/galicia/2020-02-22/familia-franco-venta-legado-nazi_2460691/

-          https://www.elespanol.com/quincemil/articulos/economia/wolframio-el-ingrediente-gallego-de-los-tanques-de-hitler

-          https://www.vigoe.es/vigo/mas-vigo/galicia-el-eslabon-oculto-de-hitler/

-          https://www.abc.es/espana/galicia/abci-galicia-iberico-segunda-guerra-mundial-202002240047_noticia.html?ref=https:%2F%2Fwww.google.com%2F

-          http://www.galiciaartabradigital.com/archivos/137258

-          https://www.eldiario.es/galicia/casaio-secretos-wolframio-empresa-galicia_1_2737629.html

-          https://galicia.economiadigital.es/politica-y-sociedad/los-nazis-de-sofindus-la-historia-detras-de-la-leyenda-de-monte-neme_638717_102.html

Última reunión do curso do Club de lectura Letraferit

O luns 10 de xuño tivemos a última reunión do curso do Club Letraferit que, coma xa vén sendo habitual nos últimos anos, consistiu nunha comida compartida na Biblioteca na que houbo tempo para facer a valoración da actividade do club deste curso e tamén para compartir recomendacións de lectura para o verán.
Polo que respecta ás valoracións realizadas, a boa convivencia nas reunións e a variedade de propostas lectoras seguen a ser as cuestións máis valoradas polos membros do Club, aínda que este ano -sobre todo no último trimestre- a existencia de varios clubs de lectura dificultou o calendario de reunións deste club en concreto posto que as 3 coordinadoras dos clubs tamén forman parte deste e teñen que combinarse.
Polo que respecta ás recomendacións de lectura para o verán en lingua castelá, houbo un pouco de todo: desde propostas de lectura máis lixeiras e de temática humorística como Pretérito imperfecto (2018) de Nieves Conconstrina ou Gamberro y caballero (2017), de Miguel Lago,

ata novelas históricas de longo percorrido, como a Triloxía dedicada ao emperador Trajano de Santiago Posteguillo, composta por Los asesinos del emperador (2013), Circo máximo (2015) e La legión perdida (2017),

pasando por novelas que recrean distintos episodios da Guerra Civil española e da posguerra, como Antonia (2014) de Nieves Concostrina ou a novidade Largo pétalo de mar (2019), de Isabel Allende.

Polo que respecta á literatura en lingua galega, houbo recomendacións tamén moi variadas: títulos de autores moi do gusto dos membros deste club, como Atuado na braña (2002) ou Era por setembro (2004), de Xabier Quiroga; Os fillos do lume (2017), de Pedro Feijóo ou A viaxe de Gagarin (2014) de Agustín Fernández Paz,

e tamén houbo recomendacións de novidades como O último barco (2019) ou Por puntos (2019), de Manuel Portas,

e recomendacións en portugués: Dormir com Lisboa (2017), de Fausta Cardoso Pires, novela gañadora do II Premio Antón Risco de Literatura Fantástica.

Reunións do Club de lectura Hora de lectura no 2º cuadrimestre

O libro de lectura do 2º cuadrimeste foi Contos de fantasmas no Museo, editado polo Museo Provincial de Lugo e que recolle relatos de Ledicia Costas, Andrea Maceiras, Anxo Fariña e Carlos Negro. O libro é de descarga gratuíta na propia web do Museo no enderezo: http://www.museolugo.org/publicacions.asp?mat=92 e posteriormente é instalado nos dispositivos electrónicos da Biblioteca.

Na reunión do 18 de febreiro fíxose entrega dos dispositivos e dos libros en papel ao alumnado do Club e realizouse unha sesión de lectura electrónica para familiarizar ao alumnado con este tipo de lectura (en táblet ou en e-reader).
Aquí deixamos unha foto:

As seguintes reunións do Club tiveron lugar o 11 de marzo e o 8 de abril. O día 27 de abril, no marco dos actos da Semana do Libro, o alumnado de 1º da ESO realizou unha visita ao Museo Provincial de Lugo para facer as 4 Rutas literarias baseadas nos 4 relatos do libro. Nesta actividade, os membros do Club de Lectura actúan como guías dos seus compañeiros no desenvolvemento da actividade.

O día 6 de maio tivo lugar a última reunión do ano e nela fíxose unha valoración das actividades desenvolvidas. O que máis estiman os alumnos do Club son as actividades coas que se pechan as lecturas dos libros (concurso de sobremesas e viaxe a Lugo) e que explican a súa repetición ao longo da existencia deste Club.

Reunións dos clubs de lectura de francés no 2º cuadrimestre

Continuando coa dinámica iniciada no trimestre anterior, as reunións dos 2 clubs de lectura tiveron lugar nos recreos. As lecturas escollidas foron: On a volé Mona Lisa, de Cécile Talguen para 4º da ESO e Photos de nuit, de Thierry Gallier  para 1º de Bacharelato.

Houbo reunións nos recreos do 28 de xaneiro, para o reparto de libros e do 25 de marzo. A última reunión foi o 27 de abril (con 1º de Bach) e o 30 de abril (con 4º da ESO) e nelas valorouse a actividade. En xeral o alumnado valóraa moi positivamente (especialmente o grupo de 1º de Bach, onde se atopan varios membros do Club Letraferit) e considera que unha actividade deste tipo permite afondar no coñecemento dunha lingua estranxeira desde outro punto de vista (menos académico e máis lúdico). Aquí deixamos unhas fotos da reunión do último día de 1º de Bach e de 4º da ESO.

 

 

 

Reunións do Club de lectura de portugués no 2º cuadrimestre

No 2º cuadrimestre do curso a lectura é Harry Potter e o prisioneiro de Azkabán.

As reunións tiveron lugar  no 1º recreo (de luns ou mércores) na Biblioteca os días 20 de febreiro, 20 de marzo, 8 de abril. Fotos da reunión do 20 de marzo:

A Semana do Libro tivemos 2 reunión especiais en martes e mércores porque o alumnado do Club preparou unha actividade especial para celebrar o 45ª aniversario da Revolução dos Cravos en Portugal. Así, o xoves 25 de abril explicáronlles aos seus compañeiros de 2º da ESO o porqué deste feito histórico e as súas repercusións na actualidade. Aquí deixamos o enlace os power point  elaborados polos alumnos para a presentación, así como as fotos dos libros utilizados:

https://drive.google.com/drive/folders/1Obs1Ms30mmnbEkyCPyNJBedkpdtp_Rzj?usp=sharing

As restantes reunións tiveron lugar os días 8 e 22 de maio. No último día comentáronse os últimos capítulos do libro acompañados dunha "mini-merenda" de leite (cortesía do centro) e chocolatinas (cortesía da coordinadora) e fíxose unha valoración do desenvolvemento das actividades deste Club. Para os alumnos, a posibilidade de realizar unha lectura do seu gusto (escolléronas eles) nunha das linguas que estudan no centro foi estupendo porque lles permitiu afondar na propia lingua case sen se decatar e pasar momentos moi agradables cos compañeiros.
Aquí deixamos unhas fotos do último día:

Reunións do Club de lectura Letraferit no 2º trimestre

A 4ª reunión co curso tivo lugar o luns 28 de xaneiro no horario habitual (3.30-4.30). Neste reunión realizouse a valoración final das 2 obras de lectura propostas: os que leron ambas propostas destaca especialmente que a través da lectura puideron coñecer episodios do noso pasado recente e relacionados coa Guerra Civil e a posguerra españolas, episodios pouco coñecidos pola maioría e que, no caso do detallado por Manuel Gago, implicaban a Galicia directamente. Trátase de 2 autores moi do gusto deste Club de lectura, nos dous casos levamos xa 2 obras lidas de cada autor e a maioría manifesta que pensa continuar lendo a estes autores...

A 2ª parte da reunión estivo destinada á presentación das lecturas do 2º cuadrimestre: a profesora Mª Jesús Barbeira, membro do Club e coordinadora do Club Hora de lectura, realizou a presentación da 1ª das propostas: Zapatillas rotas (Xerais, 2014) de Xabier Quiroga. Deste autor leramos o curso pasado Izan o da saca e supuxo un verdadeiro descubrimento para a moitos membros do Club, polo que esta escolla vén directamente das súas peticións. Para a nosa compañeira Chus é un texto singular, que nos vai descubrir unha historia moi reveladora do funcionamento do mundo de hoxe en día... e non quixo contarnos máis!... Por outra parte, a lectura deste libro está facilitada por atoparse no catálogo da plataforma ELBE2 á que pertencemos.

A 2ª das propostas de lectura foi realizada pola Coordinadora do Club e, como a anterior, obedece tamén ás suxestións de lectura dos membros do propio Club, concretamente de Gala Cernadas, que foi membro do Club ata o curso pasado que rematou os seus estudos no centro. Trátase dos 2 volumes de Jacqueline Kelly sobre o personaxe de Calpurnia Tate: A evolución de Calpurnia Tate (ed. orix. inglés 2009; trad. cast. 2011 e trad. gal. 2018)

 

e O curioso mundo de Calpurnia Tate (ed. orix. inglés, 2015; trad. cast 2017 e trad. gal. 2018).

A Coordinadora indica que se trata dunha novela de protagonista xuvenil que presenta o espertar dunha nena do Texas de 1899 á exploración do mundo que a rodea da man do seu avó e do libro de Charles Darwin, pero tamén ao que supón para ela ser unha nena e non un neno.

Despois da escolla das lecturas poles membros do Club, rematou a reunión. Fotos desta reunión:

 

O luns 25 de febreiro tivo lugar a 5ª reunión do curso e nela fixéronse as primeiras valoracións (moi positivas) das lecturas do cuadrimestre. Aquí quedan unhas fotos:

O luns 25 de marzo tivo lugar a 6ª reunión do curso na que os membros do Club presentaron as súas valoracións (finais en varios casos) das lecturas recomendadas e se fixeron algunhas recomendacións lectoras por parte dos membros do Club. O 1º libro de Calpurnia xa foi lido pola maioría de membros do Club que xa empezaron ademais o 2º libro. Desta lectura destácase a construción da personaxe principal, a súa relación co avó e o achegamento de ambos á natureza e á sociedade que os rodea.

Do libro de Xabier Quiroga destácase especialmente a construción da trama e a coidada recreación dos episodios do pasado que afectan directamente á acción do presente. Tamén foi valorada a lectura realizada na plataforma ELBE.2 por parte dos membros do Club xa que a maioría utilizou este sistema de lectura. Para todos foi unha experiencia positiva e cómoda, aínda que os alumnos destacaron que sería interesante aumentar o tempo de préstamo (de 15 a 21 días, por exemplo).

Polo que respecta ás propostas de lectura realizadas, Mª Jesús Barbeira recomendounos 'Tardes con Margueritte' (trad. ao cast. 2011; trad. ao gal. 2016), publicada orixinalmente en francés: 'La tête en friche' (2009) de Marie-Sabine Roger, e da que tamén existe adaptación cinematográfica (2010). Para a nosa compañeira sería unha proposta de lectura moi interesante para o curso que vén e que podería ser compartida por varios clubs de lectura do centro ao existir versións en galego, francés e castelán.

Aquí quedan varias fotos dese día: